4. Ivyo rero ni vyo abakozi bigina, kandi bashaka kugabisha abo bose ba mpemayuzuye, bashaka kugumiza abanyagihugu mu buja, na bo bujuje inda zabo, abandi bipfumbereje.
Ng’ Uwutambana na mukeba ntakubita urugohe. Uyu musi rero, si umusi wo gutambira abategetsi, ni umusi nyabuna wo kwibutsa, yuko ibibi abategetsi bariko baradukorera, badateshejwe ngo bate, bazoruhira kuvyishura. Kwibutsa kandi ko, no mu bindi bihugu, abacinyiza abanyagihugu batsinzwe n'abo banyagihugu nyene, bafatanye mu nda, kuko burya ngo Inyakamwe inyaga imwe. Abanyagihugu bagiye hamwe, inguvu zabo ntizikangwa n’ibikoho canke za burende.
5. Ng’aha iwacu, muri kahise, na canecane ku ntwaro za Gikoroni, agacinyizo k'abanyagihugu, mu kubakoresha babahemba intica ntikize karigeze. Ikiro c'ibiterwa njabukamazi nk'ikawa, ipampa, icayi, n’ibindi bakabigura intica ntikize. Ku ntwaro z'icami, abanyagihugu nka bose, batobato bari abagererwa, umwanya munini baba bariko bakorera ba sebuja, canke abarongozi babo, bagahembwa ingero idashobora no kumara umwana inzara.
Ariko akamaramaza, ni ivyo turiko turabona iki gihe vyitwa ngo turi mu ntwaro za demokarasi, zategerezwa kurangwa n'isabikanywa ry'itunga ry'igihugu, ata wandya wangura. Ni na co gituma rero, uyu musi wahariwe akazi n'abakozi, ari isango rihambaye cane. Si umusi rero wo, kwiyereka no kuvyinira canke gutambira abategetsi babombotse inda ngaha iwacu, mbere n'ahandi henshi, ni isango ryo kwibutsa akababaro, amagorwa abakozi bo mu Burundi bagowe, benshi ndetse bakaba ari abashomeri, mu ntumbero yo kubakebura no kubagabisha, kuko abo babombotse inda, ni bo nkomoko y'ayo mahano turimwo.
6. Uyu musi kandi, uhuriranye n’uko abarundi benshi muri rusangi, na canecane abakozi, tutavuze abashomeri, abirimizi, bugarijwe n'ubukene butagira izina, bitewe n'abategetsi bazingamitse ubutunzi bw'igihugu, mu busuma, bwabaye ubunyonyezi, ivyo na vyo bigatuma umwimbu mu gihugu wagiye uragabanuka uko umwaka utashe, ifaranga ryacu ritakaza agaciro. Kwiyunguruza bisigaye ari amananiza kubera amabarabara yasivye, ibitoro bikama vyabuze. Aba kera ni bo bayamaze bati Intabarirwa ibarirwa n’uko amaso atukuye.
7. Uyu musi mukuru w’abakozi ushitse kandi, mu gihe hari impunzi z’Abarundi zababa ibihumbi amajana atatu, zikwiragiye kw'isi yose na canecane, ngaha mu karere Uburundi burimwo. Izo mpunzi, zari zisanzwe na zo nyene, ari abakozi imbere yuko bangazwa, n’ubutegetsi bubi buhari ubu.
8. Vyongeye, uyu musi ushitse abanyakazi, canecane ba Reta, basigaye bahembwa intica ntikize kubera imishahara yatitutse, mbere na ka gashirukabute ko ku mwaka ku mwaka bita « annales », kakaba karahagaritswe ku gahotoro. Ibiciro vy'ibintu, vya nkenerwa, kugira ngo umuntu abeho, yongere agire amagara meza, nk'imfungurwa, imiti, uburaro, kwiyunguruza... vyarabaye umurengera. Ehe raba mu mwaka umwe gusa, nk’igiciro c'umuceri, ibiharage, ubududu n’ibindi caduze muri rusangi, incuro zibiri canke zirenga. Nk’ikiro c’ubududu, ibiharage, usanga caduze incuro nka zibiri! Iyumvire nawe kugura Ubududu amafaranga arenga 2000, n’ejo bundi mu mwaka uheze kitarenza 600 ! Ariko Umukuru w’igihugu akirirwa arihayagiza ngo, nta nzara, nta bukene biriho mu gihugu, ngo n’aho amakungu, atodufasha, twebwe turishoboye, ngo dukwiye gufasha abashonje mu bihugu vya Buraya. Kugeza n’aho avuga ngo Imirima isigaye yumira ku misozi kandi ariko aravuga iyiwe gusa canke iy’abandi bategetsi nka we ! Guhimiriza abategetsi kwijukira uburimyi n’ubworozi ni vyiza cane. Ariko kandi twokebura iyo Reta kutanyaga amatongo abanyagihugu bahora birimira, nk’uko hari imyidogo myinshi ibura aho ishikira, dufashe akarorero nko mu Cibitoke !
Agashahara abakozi ba Reta baronka, ntigashobora n’ukuriha inzu baba bapanze, ku buryo benshi babayeho ku Mana, kumwe nyene bavuga ngo, ntawumenye igitunga inyongori.
9. Ako karenganyo abakozi bagirirwa ng’aha mu Burundi, kunyuwe n’uko ubutegetsi buhari ubu, butanga ubuzi kuri nkunzi, ata bibazo bibanje gukorwa, kugira akazi karangurwe n'abagashoboye, mbere n’iyo nkunzi ikaba itegerezwa kuba iri mu mugambwe uri ku butegetsi, aho umuntu atakimenya, gutandukanya ivya Reta, n’ivy’uwo mugambwe nyene, wigize akagaramaruganda mu Burundi.
Muti ivy’amasendika vyo vyifashe gute ?
Barundi, Barundikazi, Banyakazi mwese,
10. Kuri iyi ntwaro yo kuva mu 2005, nta mukozi n’umwe acubahuka kuryogora, kubera yuko amasendika abushitse, yahora yubahuka kuvugira abakozi, yose barayasambuye maze abari bayarongoye benshi, abatahasize ubuzima, barahunze. Reta ica yishiriraho amasendika ya seniryo. Ntawugikura ururimi mu kanwa, ahandi hoho yohasiga agatwe.
11. Uyu musi rero wa mbere Rusama 2023, ni ukwibuka intwari z'abarundi, canecane mu rwaruka n'abakenyezi bagandaguwe muri ya myiyerekano yo mu 2015 yo kugwanya manda ya gatatu ya Nkurunziza, ata kindi bazira, atari ugaharanira ineza y'abarundi n’agateka kabo. N’icerekana ko bari mu kuri, sentare y’Ishirahamwe ry’ibihugu vya Afirika yo mu Buseruko, yaraciye urubanza, Reta iratsindwa. Reta rero yari ikwiye gutanga indishi y’akababaro ku barundi bose bahasize agatwe, ikongera ikarekura abo bose bapfunzwe kubera bariko baragwanya manda ya gatatu ya perezida. Abapfunzwe bose kubera iryo shaka, ni ngombwa ko Reta ibarekure. Kwibutsa abategetsi kandi, yuko intwari n'ubu zagwiriranye, zitazotezura Reta y'igikenye itatuvuye ku mutwe. Ariko kandi, ntibarindire gushika aho abanyagihugu badundubigwa, ni baje barumviriza izo nkebuzo.
12. Kuva iyo Reta ifashe ubutegetsi, abanyeshure, ari bo bakozi b’ejo, barahaboneye amakuba, kubera iyo ntwaro. Reta, aho kwongereza agafashanyo kahora gahabwa abanyeshure, bo muri za kaminuza yaragafuse, muzi namwe ingene igihugu cacu gikenye abakozi benshi b'incabwenge, canke b'abahinga. Mu bihugu bitari bike kw'isi, abana b'igihugu biga ku buntu, kuva mu ya zero, gushika barangize kaminuza. Reta yose yisoneye, umugambi ishira imbere, ni kiremwa muntu, na canecane kwigisha abana bose b'igihugu. Ivyo ni vyo, bituma demokarasi itsimbatara, n'isabikanywa ry'ubutunzi rishoboka. Ariko tweho, umengo kaminuza yemerewe abakire gusa. None abanyagihugu babayabaye babaye aba nde ko Kaminuza za Reta zategerezwa kwakira abo bose bavuye muri ya ma “Lycéés Communales” yakira abanyeshure bari musi y’ibice 30 kw’ijana vy’abamenye ca kibazo ca Reta, abandi baca baba aba nde ko Kaminuza z’abikorera utwabo zizimvye cane?
13. Tubivuge tubisubire, iyo Reta yarananiwe no gukingira abakozi bakorera amasosiyete yigenga ahonyanga uko ashatse amategeko agenga akazi, abatari bake, bafise amatati n’abakoresha babo, ntibakironka aho bitura.
Banyakazi namwe bashomeri mwese, Barundi, Barundikazi,
14. Izo ngorane twagiye turadondagura harimwo n’ubushomeri n’ubukene bwarenze igipimo, zunyuwe n’igurishwa ridatomoye ry’amasosiyete ya Reta. Ayo masosiyete kandi, mumenye ko ari ayanyu. Ni mwebwe nyene mwasohoye imitahe yo kuyashinga mu makori mutanga. None ayo masosiyete nka yose barayagurishije, bayagurisha intica ntikize babanje kuyanyonyeza, akagurishwa ari no mu guhenuka nka za Onatel, Regideso n’izindi ubu zigeze ahamanuka. Izo bamaze gucisha ku wepfo rero ni : COTEBU, ONAPHA, amabanki menshi, OCIBU, Ikivuko… Amatwi adusumira na za SOSUMO, ONATEL, OTB bagiye kuzigurisha ; nta wuzi yuko na Regideso batazohava bayicisha ku wepfo, nk’uko twamaze kubivuga irageramiwe cane. Muraraba neza, n’impwemu muhema bazohava bazigurisha. Ikitavuzwe coco, ni uko ubutare n’agataka bamaze kubigurisha ku masosiyete mpuzamakungu. Turazi ko Umukuru w’igihugu yatangaje icese, haraheze ikiringo kirenga umwaka yuko afuse amasezerano Reta yagiraniye n’ayo masosiyete acukura ubutare. None amahera y’agaciro basahuye mw’igurishwa ry’ubwo butare ari hehe, ko twumva ashobora kuba ari ibihumbi amajana n’amajana y’amadolari? Amakoperative yari atunze abanyagihugu bacukura ubutare barayigaruriye hariya mu Cibitoke n’i Muyinga,
Muti none hakorwe iki ?
Uburundi ni agahugu gatoya, ariko gafise itunga ryinshi : itunga rya mbere ni abanyagihugu bakunda ibikorwa cane, ngira muri Afirika nzima, baza kw’isonga. Uburundi bufise itunga kama ryinshi cane, imvura ikwiye, amazi meza y’umusarara n’isi imera, ubutare bwinshi cane kandi butandukanye n’ibindi. Iryo tunga rirasesagurwa, irindi rigaherera mu mipfuko y’akagwi k’abantu bari ku rushi, biziziye ubutegetsi. Bamwe Deniza Nkurunziza yita « Abarundarundanya », kandi murundikazi avuga abo azi neza ! Hamwe bogarukana amahera n’ubutunzi bamaze gusahura igihugu, nta nkeka, ingorane nyinshi mu gihugu zogabanuka, n’imishahara ikongerezwa, abana bakiga ku buntu koko, kandi baronka ivya ngombwa, bakavugwa ku buntu koko. Kuko aho bigeze ubu, ababishoboye, na bo bakaba bari ku rushi, kugira bavugwe neza baja canke babanza kuja ku Muganga yikorera utwiwe. Mwarigeze kwumva yuko Nkurunziza yanyegeje muri Panama imiriyoni zirenga 465 z’ama Ero, ayo rero ni ayamenyekanye. Ayataramenyekana asumba ayo incuro nyinshi.
1. Harageze rero, nimba hatariko hararengerana, ko abarundi bose bahagurukira rimwe, bagasezera intwaro z’agacinyizo nk’uko babigize mu 1993, maze dushinge intwaro yitayeho mwebwe abakozi, intwaro ibitaho atari iyo kubasambura n’ukubanyonyeza. Muti gute ?
2. Korakoraneko mushigikire umugambwe CNDD wamye uharanira ineza y’abakozi, kandi muri make wiyemeje imigambi nk’iyi ikurikira yo gushayura Uburundi: Kugwanya no gutsinda inzara, ibiturire, ubukene, ubushomeri, mu myaka itanu ukazosanga igihugu kimaze kuhagarara neza, gifise n’ijunja mu makungu; Kugabanura canke gufuta amakori amwamwe arya imitsi abanyagihugu canecane batobato; gushinga no kugwiza amahinguriro atanga akazi ; Kugira poritike y’amasoko ntanganguvu zivuye ku ngomero z’amazi; Kurangura umugambi w’ukwigisha bose gusoma n’ukwandika hanyuma tugarukire indero mu mashure kugira ngo ahinduke koko igikoresho kijana kw’iterambere ; Kugira poritike yerekeye amagara y’abantu itanga uburenganzira ku bantu bose bwo kwivuza uko bibereye; Kworohereza abakenyezi mu bikorwa vya misi yose; Kugira poritike y’uburaro ku buryo umurundi wese aronka uburaro bwiza ku giciro kibayabaye ; Gusezerera ukudahana n’ugusubiza ubwigenge ubutungane; Gusubiza agateka n’ijambo imigambwe, amashirahamwe adaharanira ivyicaro vya poritike na canecane amasendika y’abakozi, abarimyi n’aborozi n’abanyamyuga hamwe n’ayagwanya ibiturire, maze igiturire gisigare ari indahiro mu Burundi; Kunonosora no gutorera inyishu ibibazo vy’amatongo no gutunganya neza umugambi w’ibigwati ; Kugarukana ubutagisubira inyuma amahoro n’umutekano mu mihingo yose y’igihugu no gufuta imigwi yitwaje ibigwanisho; Gutorera inyishu ibereye kandi irama ingorane z’impunzi, abahunguka, abateshejwe izabo n’abasinzikajwe n’ivyago; Guhiga no kugarukana mu kigega ca Reta itunga ryanyurujwe n’abategetsi; Kugarukira Amasezerano y’i Arusha n’Ibwirizwa Shingiro riyakomokako, tutibagiye kurekura abo bose bapfungiwe ivya poritike; Gusubiza umutamana Uburundi n’ishusho nziza mu makungu ; Kunagura akaranga k’abarundi n’Uburundi n’imico kama, Kwunga urunani n’ibihugu vyo muri Afrika bishaka kwubaka Reta zunze ubumwe bw’Afrika zubahiriza abakozi n’akazi. Iyo migambi ntizoja mu ngiro mu gihe tutavavanuye n’intwaro yiziziwe na bampemayuzuye, bamenyereye kurya n’ukurundarunda ivyo batabiriye akuya. Shigikire rero CNDD, ifise abanywanyi n’imboneza zizirana n’akagaye n’akarenganyo, mbere tukaba twiteze cane kugira inani n’amashirahamwe n’imigambwe yanyuzwe koko n’ingendo yo gukorera n’ukuzamura abanyagihugu bose ; twese hamwe n’igihugu cacu, tukagira amahoro yuzuye, Iteka n’Iterambere nk’uko ari indamukanyo yacu.
Mu kurangiza, nagira nsubire kubipfuriza umusi mukuru mwiza. Uwo musi uhambaye ku bakozi, ubabere akandi karyo keza ko kurimbura aho agateka kanyu kageze, kugira ntitureke ngo intambwe ya demokarasi twaharaniye kuva kera, ari yo yubahiriza akazi n’abakozi, ngo igende isubira inyuma nk’ibirenge. Ngo Icerekwa ni ikibona, ikibarirwa na co ni icumva, duhagarare bwuma ntidusubire mu ntwaro y’umugambwe umwe rudende.
Rero, Umugani w’incungu ya Demokarasi, Nyakwigendera Melikiyoro Ndadaye ati « Nabagwanya Demokarasi barayikeneye », Abo bita aba DD na bo nyene, basa n’abagoswe, ntibaherezeyo umutwe, twese hamwe haguruka duhabuze ico twagwaniye, na canecane kuva Ndadaye agandaguwe !
Nti Nitugire amahoro, iteka n’iterambere !
Ku wa mbere Rusama 2023,
Umukuru w’Umugambwe CNDD,
Leonarudo NYANGOMA.-
